Si oe cherimus bogare a campu un’alternativa natzionale sarda, trasversale e populare, superende s’ideologia autonomista, si pretendimus unu deretu istòricu a sa soverania de sa natzione sarda, nos devimus apoderare de s’istòria, analizende sos elementos de continuidade de unu progetu nostru de soverania.
Chie como si firmat suta de sa turre de Lungoni (Santa Teresa) de seguru est pro abbaidare su mare e sa Còrsica. E non pessat chi su 19 de làmpadas de su 1802 est capitadu s’eventu eròicu chi at cungiadu sos annos rivolutzionàrios sardos cumintzados su 28 de abrile de su 1794, cun sa morte de su protagonista de su tentativu de formare una repùblica sarda, su preìderu Frantziscu Sanna Corda. S’ùrtimu tentativu armadu de pràtica soveranista.
E tando, su 16 de làmpadas de su 1802, Sanna Corda e sos àteros òcupant sa turre de Ìsula Ruja, sa de Vignola e sa de Lungoni, proclamende s’insurretzione e sa Repùblica. Ma su 19 sas tropas guvernativas atacant sa turre de Lungoni, ochient a Sanna Corda e, pustis, tenent a F. Cillocu, chi est cundennadu a morte e infurcadu in Tàtari su 30 de austu de su 1802.
Dae tando, in medas si sunt interessados de cussos oto annos, presentende·los comente movimentos antifeudales o comente “giacobinos”, riflessu locale de sa rivolutzione frantzesa de s’89. A su sòlitu, sos istudiosos ufitziales ant esclùdidu chi esseret unu disinnu natzionale pro fraigare una repùblica indipendente.
A pàrrere nostru, su movimentu chi fiat cumintzadu comente una rebellia populare contra a sas cunditziones sotziales patidas pro more de su sistema feudale, ghiada dae sos burghesos “illuminados” dae sas ideas de s’89, fiat culminadu in su 1802 in unu progetu rivolutzionàriu indipendentista. Ma, cumintzadu comente protzessu chi interessaiat deghinas de biddas e mìgias de pessones, pustis de sa derrota de su 1796, cando una parte de sos capos si fiat disposta in favore de sos Piemontesos e s’àtera, cun Angioi e sos cumpàngios, si fiat assugetada a s’esìliu in Parigi, su movimentu si fiat indebilitadu de su totu ma si fiat radicalizadu. E gasi, sa parte rapresentada dae su preìderu Frantziscu Sanna Corda e dae su notàriu Frantziscu Cillocu fiat arribbada a ipotizare in manera crara un’insurretzione republicana e indipendentista.
Ma in cussos oto annos, fiant cambiadas cosas meda, in peus. In su cumintzu de su sèc. 18: a) sa gente chi aiat gherradu in su 1794 contra a sos feudatàrios non fiat prus disposta a sa rebellia; b) su prus de sa burghesia sarda residente in Sardigna si fiat rèndida a sos binchidores; c) sos frantzesos non teniant prus interessu a agiuare sos patriotos sardos, mescamente a pustis de sa paghe de Lunéville de su 1801 e sa paghe de Amiens de su 1802 intre Frantza e Rennu de Sardigna.
Duncas, cantu prus su movimentu republicanu e antipiemontesu si fiat indebilitadu in Sardigna e in su disterru, tantu prus si fiat radicalizada sa bisione polìtica de Sanna Corda e de sos pagos cumpàngios chi l’aiant postu in mente. E si fiat crarida finas sa posta: unu progetu insurretzionale republicanu e indipendentista. Ma, a dolu mannu, su disisperu de Sanna Corda, chi timiat de pèrdere s’ùrtima ocasione pro una Sardigna lìbera, aiat trasformadu su movimentu in elitàriu, cundennadu a pèrdere sena s’agiudu de sa Frantza e sena base populare (petzi cun sa prominta de agiudu de su bandidu Pedru Mamia chi, pustis, los traighet e cunsinnat a sos Piemontesos!). Sena base populare e trasversalidade, sos movimentos natzionales non bichent. A su nessi oe.
Diegu Corràine, diretore de s’Ufitziu de sa Limba Sarda
